Еуропалық Одақ шеңберінде зияткерлік меншікті қорғаудың құқықтық аспектілері
DOI: 10.32523/2791-0954-2022-1-1-74-90
Қаралымдар: 1
Кілт сөздер:
ЕО, ДСҰ, ТРИПС жөніндегі келісім, зияткерлік меншік, құқықтық реттеу, авторлық құқық, патенттік құқық.Аңдатпа
Бүгінгі таңда зияткерлік меншіктің маңыздылығы технологияның дамуына және халықаралық сауда көлемінің ұлғаюына байланысты артып келеді. Еуропалық Одақ (ЕО) халықаралық деңгейде танылған ұйым ретінде зияткерлік меншік құқықтарын қорғау талаптарын стандарттауға және оларды нарықтың жаңа жағдайларына байланысты бейімдеуге баса назар аударады. Мақалада ЕО шеңберінде зияткерлік меншікті құқықтық реттеудің жалпы сиппаттамасы мен ерекшеліктері қарастырылады. Жұмыстың мақсаты ЕО-ның мүше елдеріндегі ғылыми-техникалық үдерістің нәтижелерін және олардың халықаралық бәсекеге қабілеттілігін күшейту
мақсатында зияткерлік меншік құқықтарын қорғауды жетілдіру жөніндегі ісшараларын талдау болып табылады. Сондай-ақ, ЕО-ның зияткерлік меншік құқықтарын қорғауының басты себептері мен оның қызметінің негізгі
бағыттары, атап айтқанда, ұлттық қорғау нормаларын жақындастыру талданады.
ЕО-ның зияткерлік меншікті қорғау саласындағы заңнама алдында тұрған негізгі міндеттері мен авторлық және сабақтас құқықтар саласындағы саясатының негізін қалаушы құжаттарды талдауға да назар аударылды. Сонымен бірге, ЕО-да зияткерлік меншікке қатысты құқықтарды қорғаудың Дүниежүзілік сауда ұйымының (ДСҰ) Зияткерлік меншік құқықтарының сауда аспектілері жөніндегі келісімінің (ТРИПС жөніндегі келісім) талаптарымен байланысы атап өтіледі. Зерттеуді жүргізу барысында ғылыми абстракция, сараптамалық бағалау және құрылымдық талдау секілді жалпы ғылыми әдістер қолданылды. Авторлар зерттеу жүргізу шеңберінде ЕО-ның мүше елдері арасында зияткерлік меншік құқықтарын қорғау тәжірибесі жеткілікті жоғары деңгейде екенін анықтап және бірқатар елдерде инновациялардың белсенді дамуына ықпал ететіні туралы қорытындыға келеді.
